2020.12.03

Ц.Даваасүрэн: Зээлийн эргэн төлөлтөд нүүрсний экспорт хамааралтай тул анхаарах хэрэгтэй

УИХ-ын чуулганы өнөөдрийн \2020.12.03\ нэгдсэн хуралдаан эхэллээ. Хуралдаанаар Монгол Улсын Засгийн газар, Японы олон улсын хамтын ажиллагааны байгууллага хоорондын “Ковид-19 цар тахлын эсрэг хариу арга хэмжээний яаралтай тусламжийн зээл”-ийн Зээлийн хэлэлцээрийг  соёрхон батлах тухай хуулийн төслийг хэлэлцлээ.

Хуулийн хэлэлцүүлгийн үеэр УИХ-ын гишүүд асуулт асууж, санал хэллээ. 

УИХ-ын гишүүн Ц.Даваасүрэн:

Хөнгөлөлттэй зээлийг авахыг дэмжиж байна. Бид төсвөө алдагдалгүй байх, зээл авах ёсгүй гэж ярьдаг. Гадаад зээлийн төлбөр зээлээр төлөгдсөн. Тиймээс гадаад зээлийн ДНБ-тэй харьцуулсан харьцаа бол дорвитой буураагүй гэж бодож байна. Судалгаа шинжилгээ дүгнэлт муу байна. Зээлийн асуудлыг ажлын хэсэг гаргаад нягтлах хэрэгтэй байх.

Би юунаас айж байна гэхээр гадаадын зээл төлөхөд зөвхөн нүүрснээс хамааралтай байна. Экспортын орлогын 60-70 хувийг нүүрс бүрдүүлж байна.  Энэ жилийн хувьд алтны үнэ өндөр байгаа учраас гадаад төлбөр саатахгүй яваад байгаа байх. Хэрвээ нүүрс экспортлох ямар нэг хүндрэл гарвал бид диполт болно шүү. Маш хүнд нөхцөл байдал үүснэ. Тийм учраас зээлийн асуудал дээр бүх түвшиндээ анхаарахгүй бол болохгүй.