2023.05.04

О.Цогтгэрэл: Нийгмийн хүлээлтэд нийцсэн чанартай хууль гарах нөхцөл харагдахгүй байна

УИХ-ын чуулганы /2023.05.04/-ны хуралдаанаар Боловсролын ерөнхий хуулийн төслийн анхны хэлэлцүүлгийг хэлэлцэж байна.

Хэлэлцэж буй асуудалтай холбогдуулан гишүүд асуулт асуулаа.

УИХ-ын гишүүн О.Цогтгэрэл:

Боловсролын багц хуулийг хоёр жил гаруй УИХ, нийгэм, оролцогч байгууллагууд дээр ярьснаар өнөөдөр орж ирж байна. Дунд болон ерөнхий боловсролтой холбоотой хуулийн зохицуулалтуудыг харлаа. Энэ хуулиас гарч байгаа хамгийн том мессеж нь юу вэ? Угтаа нийгмийн хүлээлт асар өндөр байгаа. Олон улсын жишиг болон олон зүйлд нийцэх ёстой гээд хүлээж буй. Гэтэл уг хуулийг харахад хүлээлтэд нийцэх гол мессеж харагдахгүй байна. Энэ хуулиар боловсролын тогтолцоонд ямар ахиц, дэвшил гарах юм. Үүнд тодруулга өгөөч.

Өнгөрсөн хугацаанд болсон хэлэлцүүлгүүдийг харахаар хувийн сургуулиа хавчин гадуурхсан нөхцөл байдлын маргаан үлдэх шиг боллоо. Хувийн сургуулиудын төлөөллөөс эл хуульд санал, хүсэлтийг нь авсан уу. Ямар байр суурьтай үлдэж байна вэ?

Боловролоороо бид олон улсын жишигт ойртож очих ёстой. Хоёрдугаарт боловсрол бол Монгол улсын хөгжлийн гарц. Бид нар хавчигдмал, дэд бүтцийн хувьд буурай, алслагдмал, цөөхөн хүнтэй. Монгол улсын тэргүүлэхийн тэргүүлэхийн тэргүүлэх чиглэл гэж байдаг бол энэ нь боловсрол байх ёстой. Боловсролын ХАБ гэдэг зүйл байдаг бол үүнийг бий болгох юмсан гэдэг амбицыг бид тавих ёстой. Энэ хуулиар ийм хэмжээний амбиц тавьж байж, зорилго гаргаснаар олон зүйл явна. Үүний магнайд нь хувийн хэвшлийн сургуулиуд явах ёстой юм болов уу. Энэ боломж, бололцоог нь нээж өгөх ёстой юм болов уу гэж бодож байна.

Түүний асуултад УИХ-ын гишүүн Г.Дамдинням хариуллаа.