НӨАТ-аас чөлөөлөх дараагийн төслийг дэмжлээ
Хууль санаачлагчийн илтгэлийг УИХ-ын гишүүн, Уул уурхайн сайд Д.Ганхуяг танилцуулав.
2013.06.06

НӨАТ-аас чөлөөлөх дараагийн төслийг дэмжлээ

Чуулганы өнөөдрийн хуралдаанаар Газрын тосны бүтээгдэхүүнийг гарган авах төслийн хүрээнд импортоор оруулж байгаа технологийн тоног төхөөрөмж, сэлбэг болон тусгай зориулалтын барилгын материалыг гаалийн болон нэмэгдсэн өртгийн албан татвараас чөлөөлөхтэй холбогдуулан Гаалийн албан татвараас чөлөөлөх тухай, Нэмэгдсэн өртгийн албан татвараас чөлөөлөх тухай хуулийн төслүүдийн хэлэлцэх эсэх асуудлыг хэлэлцлээ.

Энэ талаарх хууль санаачлагчийн илтгэлийг УИХ-ын гишүүн, Уул уурхайн сайд Д.Ганхуяг танилцуулав.

Үйлдвэрийн технологийн тоног төхөөрөмж, түүний сэлбэг, тусгай зориулалтын барилгын материалыг импортлоход гааль, нэмэгдсэн өртгийн албан татвараас чөлөөлөх замаар татварын таатай орчин бүрдүүлж өгөх нь газрын тосны бүтээгдэхүүний импортыг орлох дотоодын үйлдвэрийг барьж байгуулан, импортын хараат байдлаас гарахад томоохон түлхэц болно гэж хууль санаачлагчид үзэж байгаа бөгөөд ингэснээр нийт хөрөнгө оруулалтын хэмжээг 10-15 хувиар бууруулах боломжтой гэсэн тооцоо гаргажээ.

Дотооддоо түлш шатахуунаа үйлдвэрлэн дотоодын хэрэгцээгээ хангаснаар түлш шатахууны импортод зориулан гадагш урсаж байгаа мөнгөн урсгалыг дотооддоо эргэлтэд оруулах, ингэснээр гадаад худалдааны алдагдлыг бууруулах, түлш шатахууны хомсдол, үнийн хэлбэлзлээс хамгаалах, улс орны эдийн засгийн тогтвортой байдлыг хангах, газрын тосны бүтээгдэхүүнийг экспортлогч орон болох үндсэн нөхцөл бүрдэх аж.

Үйлдвэрийн тоног төхөөрөмж, сэлбэг, барилгын материалыг импортлоход гааль, НӨАТ-аас чөлөөлөх замаар татварын таатай орчин бүрдүүлэх нь импортын хараат байдлаас гарахад томоохон түлхэц болно.

Хууль санаачлагчийн илтгэл болон Төсвийн байнгын хорооны санал, дүгнэлттэй холбогдуулан УИХ-ын гишүүдийн тавьсан асуултын гол нь албан татвараас чөлөөлөх шаардлага байгаа эсэх, чөлөөлөх болсон үндэслэл, энэ нь төсөвт хэрхэн нөлөөлөх, жижиг, дунд үйлдвэрлэлийг дэмжсэн татварын ямар бодлого баримталж байгаа, нэмэгдсэн өртгийн албан татварын босгыг өндөрсгөх талаар УИХ-ын зарим гишүүдийн санаачлан боловсруулсан НӨАТ-аас чөлөөлөхтэй холбоотой хуулийн төслийг хэдийд хэлэлцэх, төрөөс технологийг худалдаж авах, татварын хөнгөлөлт, чөлөөлөлтийг нь төсөл хэрэгжсэний дараа урамшуулал хэлбэрээр эргүүлж нөхөн олгох боломж байгаа эсэхтэй холбоотой байв.

Хэлэлцэж буй асуудалтай холбоотой УИХ-ын гишүүд саналаа илэрхийлэхдээ, татвар, түүний дотор гаалийн болон нэмэгдсэн өртгийн албан татварын бодлогод анхаарал хандуулах шаардлагатай байгааг тэмдэглээд төр тодорхой ямар салбар, үйлдвэрлэлийг татварын бодлогоор дэмжих талаар хөтөлбөр баталж гаргах, улстөржихгүйгээр татварын зөв бодлого баримтлах, хувийн хэвшлийнхний эрсдэлгүйгээр хийж буй ажлыг нь төр авч өөртөө нэмэгдэл ачаа үүрэх хандлага ажиглагдаж байгаа, үйлдвэрлэл, технологийн паркийн үйл ажиллагааг дэмжсэн татварын таатай эрх зүйн бодлого баримтлах зэрэгт анхаарлаа хандуулав.

Газрын тосны бүтээгдэхүүнийг газрын тос, занар болон нүүрснээс үйлдвэрлэлийн аргаар гарган авах төслийн хүрээнд импортоор оруулж байгаа технологийн тоног төхөөрөмж, сэлбэг болон тусгай зориулалтын барилгын материалыг гаалийн болон нэмэгдсэн өртгийн албан татвараас чөлөөлөх тухай хуулийн төслийг хэлэлцэх нь зүйтэй гэсэн саналыг хуралдаанд оролцсон гишүүдийн 79,6 хувь нь дэмжлээ.