НӨАТ-аас бүх төрлийн будаа, ургамлын тосыг чөлөөлөв
2020.12.04

НӨАТ-аас бүх төрлийн будаа, ургамлын тосыг чөлөөлөв

 УИХ-ын чуулганы өнөөдрийн /2020.12.04/ хуралдаанаар, Нэмэгдсэн өртгийн албан татвараас чөлөөлөх тухай хуулийн төслийг баталлаа.

ТБХ-ны санал дүгнэлтийг УИХ-ын гишүүн Ж.Батжаргал танилцуулав. 

COVID-19 цар тахлын байдлыг урьдчилан төсөөлөх боломжгүй нөхцөлд хүнсний хангамжийн тогтвортой байдлыг хангах зорилгоор бүх төрлийн хүнсний будаа (цагаан будаа, гурвалжин будаа, шар будаа, бусад), ургамлын тос болон 2020-2021 оны өвөлжилт, хаваржилтыг хүндрэлгүй давахад  шаардагдах бүх төрлийн малын тэжээл, өвс, тэжээлийн үр, хүнсний улаанбуудай, улаанбуудайн үр, тослог ургамал, ургамлын түүхий тосыг импортлоход нэмэгдсэн өртгийн албан татвараас, Монгол Улсын нутаг дэвсгэрт боловсруулсан ургамлын тос, бүх төрлийн хүнсний будааг (цагаан будаа, гурвалжин будаа, шар будаа, бусад) нэмэгдсэн өртгийн албан татвараас чөлөөлөх зохицуулалтыг төсөлд тусгасан байна.

УИХ-ын Төсвийн байнгын хорооны өчигдрийн хуралдаанаар хуулийн төслийг чуулганы нэгдсэн хуралдаанаар батлуулахыг дэмжсэн байна. Байнгын хорооны танилцуулгатай холбогдуулан УИХ-ын гишүүн Б.Жаргалмаа асуулт асууж, УИХ-ын дэд дарга Т.Аюурсайхан үг хэлсэн. Ингээд санал хураахад хуралдаанд оролцсон гишүүдийн олонх хуулийн төслийг батлахыг дэмжлээ.