УИХ-ын бие даагч гишүүд
2014.01.28

НӨАТ-ын босгыг 50, 100 сая болгох хэрэгтэй

УИХ-ын бие даагч гишүүдийн зөвлөл энэ долоо хоногт хэлэлцэгдэх Хуулийн төслүүдийн талаар байр сууриа илэрхийллээ.

Газрын тосны тухай, Газрын тухай, Аж ахуйн нэгжийн орлогын албан татвар, НӨАТ-ыг бууруулах тухай зэрэг хуулиудын талаар өөрсдийн барьж буй бодлогыг мэдээллээ.

 Газрын тосны тухай хуулийн ажлын хэсгийг бие даагч гишүүдийн зөвлөлийг төлөөлөн УИХ-ын гишүүн Х.Болорчулуун ахалж ажиллаж байгаа. Тэрбээр, "Газрын тосны тухай хууль ирэх долоо хоног гэхэд батлагдана. Гол олборлогч нь Петро чайна Дачин тамсаг компани. Өмнө нь бид энэ компанийг олборлосон газрын тосны үндсэн ашгийн 20 гаруй хувийг эзэмшдэг байсан бол шинэ хууль батлагдсанаар үндсэн ашгийн 40 хүртэлх хувийг авах боломж бүрдэнэ. Түүнчлэн хуульд хариуцлагын асуудлыг ч тусгайлан авч тусгасан байгаа" гэв.

УИХ-ын гишүүн Ц.Даваасүрэн Аж ахуйн нэгжийн орлогын албан татварын тухай хуульд нэмэлт оруулах тухай болон Нэмэгдсэн өртгийн албан татварын тухай хуульд өөрчлөлт оруулах тухай хуулийн төслийн талаар байр сууриа илэрхийлэв.  Тэрбээр "1.5 тэрбум төгрөгөөс дээш орлогтой аж ахуйн нэгжийн татварын 90 хувийг буцаан олгох асуудлыг дэмжинэ. Мөн НӨАТ-ын босгыг 50, 100 сая болгох нь зөв. Энэ нь жижиг, дунд бизнес эрхлэгчдийг дэмжих том алхам" гэсэн юм.