Төсөлд парламент дахь нам эвслийн бүлэг чуулганы хуралдаанд найм болон түүнээс дээш удаа ирцээ 50-аас дээш хувиар бүрдүүлж чадахгүй тохиолдолд намын бүлгийг нь татан буулгах хуулийн төсөл юм. 

Хуулийн төслийг хэлэлцэх үеэр УИХ-ын гишүүн Н.Энхболд “Парламентын ёсонд бүлэг рүүгээ дайрч байсан тохиолдол байгаагүй. Бид хариуцлагаас зугтаж байгаа юм биш. Төрийн ажлыг гацаахгүйн тулд хуралдаандаа сууж л таарна” хэмээн бухимдав. Үүний хариуд гишүүн М.Зоригт “Төрийн ажлыг хариуцлагатай болгох үүднээс энэ хуулийн төслийг санаачилсан боло­хоос бүлэггүй болгоно гэж улайраагүй. Энэ асуудлыг улс төржүүлж ойлгоод байна. Дэгтэй байж бүлэг хүчинтэй байх учиртай” гэв. Ингээд уг хуулийг хэлэлцэх эсэхээр санал хураахад гишүүдийн олонхи дэмжсэнээр Төрийн байгуулалтын байнгын хороонд шилжүүлсэн юм. Үүний дараа Н.Энхболд нарын өргөн барьсан мөн УИХ-ын дэгийн тухай хуульд нэмэлт өөрчлөлт оруулах тухай хуулийн төслийг хэлэлцлээ. Байнгын хорооны дүгнэлтийг УИХ-ын гишүүн Х.Тэмүүжин танилцуулав. Үүнд ундуйцсан УИХ-ын ги­шүүн Д.Лүндээжанцан “Гишүүн олдоогүй юм шиг Байнгын хорооны дүгнэлтийг Х.Тэмүүжингээр уншуулдаг нь ямар учиртай юм. Дээрээ суудлаа олохгүй бол доороо гүйдлээ олохгүй гэдэг.

УИХ, Засгийн газрын гишүүн хүн гурван Байнгын хороонд харьяалагдах нь учир дутагдалтай байгаа учир Ерөн­хий сайдад үүнийгээ татаач гэж хэлсэн. Тэд сайд, УИХ-ын гишүүн хийхийн зэрэг­цээ гурван Байнгын хороонд харьяалагдвал ажил нь давх­цаад самгардана” гэв. Энэ та­лаар гишүүд саналаа хэлсний дараа хэлэлцэх эсэхээр са­нал хураахад дэмжлээ. Дээрх хуулийн төслүүдийг нам­­рын чуулганаар хэлэлцэж батлах ёстойг УИХ-ын дарга З.Энх­болд гишүүдэд сануулаад ху­рал­­­даа идэвхтэй оролцохыг хүсэв. Мөн энэ өдрийн ху­рал­даанаар УИХ-ын гишүүн Л.Болд, Ц.Оюунгэрэл нарын са­наачилсан Монгол Улсын ир­гэнд газар өмчлүүлэх тухай хуулийн төслийг хэлэлцлээ. Уг хуулийн төслийн талаар гишүүд асуулт асуув.

Ө.Энхтүвшин:

Малчид газраа яаж авах вэ. Одоогоор нийс­лэлд үлдсэн газрын хэмжээ болон орон нутагт хэчнээн иргэн газар авахаар хүсэлт гаргасан юм бэ.

Ц.Оюунгэрэл:

Одоогоор Монгол Улсын иргэдийн 10.8 хувь нь газраа өмчилж авсан байна. Өөрөөр хэлбэл, 302350 иргэн гэр бүлийн хэрэгцээний зориулалтаар газартай болсон.

2002 оны Газрын тухай хуульд иргэнд газар хувьчлах тухай мэдээлэл хангалттай бус байсан. Мон­гол Улсын чухам хаана газар байгааг иргэд төдийлэн мэддэггүй байв. Одоогийн оруулж ирж буй хуулийн төсөлд энэ мэдээллийг нээлт­тэй болгох үүднээс Газрын корпорац байгуулж байгаа. Ингэснээр малчид өөрийн оршин сууж буй багийнхаа аль хэсэгт нь өмчлөх газар буйг мэдэх боломжтой болох юм. Тиймээс бусад иргэнд га­зар өмчлүүлэх талаар нарийв­чилсан судалгааг ажлын хэсэг хийж байна.

Л.Энх-Амгалан:

Нийслэлд 100 хүний 10 нь газраа өмчилж авч. Аймгийн төвд газраа өмчилж авах нь нийслэлтэй адил хэцүү болсон. Аймгийн төвийг хотын статустай болгох ёстой. Энэ талаар судалгаа хийсэн үү?

Г.Баярсайхан:

Хөдөө орон нутагт газрын хүрэлцээ муу байгаа байх гэж бодож байна. Тиймээс газар зохион байгуулах, эрхлэх үйл ажиллагаатай холбоотой хариуцлагыг нэмэгдүүлэх зайлш­гүй шаардлагатай байгаа. Харин энэ талаар УИХ-ын гишүүн Д.Арвин “Хот суурин газрын газрын иргэдийн 7.6 хувь нь газраа өмчилж авсан гэсэн тоог сонсоод үнэхээр харамсч байна. Газар өмчлөх тухай хууль батлагдаад 10 жил болсон хэр нь ямар ч хяналтгүй явж иржээ. Тиймээс УИХ хяналтын механизмыг оруулж өгөх хэрэгтэй” гэсэн санал гаргахад Ц.Оюунгэрэл “Хуучин хуульд гэр бүлийн зориулалтаар гэснийг гэр бүлийн болон аж ахуйн зориулалтаар гэж өөрчилж байгаа. УИХ-ын хаврын чуулганаар хэлэлцэх хүртэл Газрын тухай багц хуультай уялдуулан ажлын хэсэг гарган дахин ажиллах нь зүйтэй байх гэв. Ийнхүү гишүүд үргэлжлүүлэн асуулт асуусаар байсан тул энэ хуулийн төслийг ирэх пүрэв гарагийн хуралдаанаар үргэлжлүүлэн хэлэлцэхээр болов.