Монгол судлаач залуу эрдэмтэн, судлаачдын 2023 оны зуны ээлжит сургалт эхэллээ
Өнөөдөр жил бүр уламжлал болгон зохион байгуулдаг Залуу Монгол судлаачдын зуны сургуулийн нээлтийн ёслол боллоо.
Анх 1989 онд "Залуу Монголч эрдэмтний зуны сургууль" зохион байгуулагдсан түүхтэй. Харин тус арга хэмжээг 2014 оноос эхлэн Монгол Судлалын Үндэсний Зөвлөл хариуцан зохион байгуулахаар болж, Сайд Л.Энх-Амгалан тус зөвлөлийн даргын хувьд ёслолыг нээн үг хэлж, оролцогчдод дурсгалын зүйл гардууллаа.
Монгол Улсын төр засаг, монголчуудын анхаарах хамгийн чухал асуудлын нэг нь монгол судлал юм гэдгийг онцоллоо.
"Энэ нь үндэсний аюулгүй байдлын түвшинд ч яригдах ёстой сэдэв. Монгол судлалыг олон улсын хэмжээнд, өндөр түвшинд гаргахын тулд энэ талын үйл ажиллагааг хэрхэн хөгжүүлэх вэ гэдэг чухал зүйл юм. Тиймээс гадаад, дотоодын монголч эрдэмтэн судлаач, тэр дундаа залуу судлаач, эрдэмтдийг яаж дэмжих вэ гэдэг Монгол төрийн их том бодлого байх ёстой" хэмээн тэрбээр хэлэв.
Мөн, Сүүлийн жилүүдэд монголч, залуу эрдэмтэн судлаачдын бүтээл, санал санаачилга, эрдмийн ажлын үр дүнд өмнө хөрвүүлж байгаагүй, монгол судлал, Монголтой холбоотой материалууд, бичиг соёлын түүхийг гадаадын томоохон эх сурвалжуудаас эх хэлнээ орчуулж байна. Энэ нь монгол судлалд, Монголын түүх судлалд маш том хувь нэмэр болж байгааг тэмдэглэн хэлж, Шинжлэх ухаан, технологийн сангаас цаашид монгол судлалаар магистр, докторантурын сургалтад сурч буй гадаадын залуу эрдэмтэн, судлаач, оюутнуудыг дэмжих, хамтын судалгаа, бүтээлийг санхүүжүүлэх, бүтээлүүдийг хэвлүүлэх зорилготой байгаа. Энэ талаар БШУЯ идэвхтэй ажиллана гэдгийг тодотголоо.
Зуны сургуулийн гол зорилго гадаадын залуу судлаачдыг Монгол орон, Монгол ахуй, соёлтой танилцуулах, Монгол хэл, соёлын амьд харилцааны орчинд монгол хэл, түүх, соёлын сургалт зохион байгуулахад оршино.
Ингэснээр хойч үеийн Монголч эрдэмтдийг бэлтгэх, тэднийг Монгол Улсын эрдэмтэн судлаачидтай танилцуулан Монгол судлалын залгамж холбоог бэхжүүлнэ гэж үзэж байна.
2023 оны Залуу Монгол судлаачдын зуны сургуульд ОХУ, БНХАУ, ХБНГУ, Япон, БНСУ, БНТУ зэрэг дэлхийн Монгол судлалын тэргүүлэгч улс орнуудын 13 их дээд сургууль, эрдэм шинжилгээний байгууллагын 30 залуу Монголч эрдэмтэн оролцож байна.
Залуу монголч эрдэмтэн, судлаачид зуны сургалтын хүрээнд монгол ахуйтай танилцах хөтөлбөр гарчээ.
