“Хөх сувд-2023” мөсний баярт 20,000 гаруй гадаад, дотоодын жуулчид оролцлоо
2023.03.06

“Хөх сувд-2023” мөсний баярт 20,000 гаруй гадаад, дотоодын жуулчид оролцлоо

Хөвсгөл аймагт өвлийн аялал жуулчлалыг хөгжүүлэх зорилгоор жил бүр уламжлал болгон зохион байгуулдаг “Хөх сувд-2023” мөсний баяр гуравдугаар сарын 2-4-ний өдрүүдэд боллоо. Энэ жилийн мөсний баярыг “Ногоон дэлхийгээ хайрлая” уриан дор зохион байгуулж байгаа бөгөөд 20000 гаруй гадаад, дотоодын жуулчид оролцлоо.

”Хөх сувд” мөсний баярыг тэртээ 2000 онд анх нутгийн иргэдийн санаачлага, оролцоотойгоор цомхон хүрээнд тэмдэглэж эхэлсэн бол эдүгээ 23 дахь жилдээ өргөн дэлгэр зохион байгуулж, өвлийн аялал жуулчлалын улсын хэмжээний томоохон эвент арга хэмжээ болон өргөжин хөгжжээ.

Хөвсгөл нуурын ус цэвэр тунгалгаараа дэлхийд гуравдугаарт, нуурын мандлын талбайн хэмжээгээрээ Азид аравдугаарт ордог бөгөөд манай улсын цэнгэг усны 74.6 хувь, дэлхийн цэнгэг усны 0.4 хувийг бүрдүүлдэг хоёр сая жилийн настай, нэн эртний нууруудын нэг билээ. Хөвсгөл нуурын сав газар нь ховор ан амьтан, жигүүртэн шувууд, ургамлаар баялаг, байгалийн өвөрмөц тогтоцтой нутаг учраас түүнийг хамгаалах, аялал жуулчлалыг хөгжүүлэх, судалгаа шинжилгээ явуулахад зориулж 1992 онд улсын тусгай хамгаалалтад авсан байдаг.

Одоогоос нэг жилийн өмнө Монгол Улсын Ерөнхийлөгчийн ивээл дор “Хөвсгөл нуурыг хамгаалах үндэсний чуулган” зохион байгуулагдаж, нуурын экосистемийг хамгаалах, бохирдол, доройтлыг бууруулах, тулгамдсан асуудлыг шийдвэрлэх, тогтвортой аялал жуулчлалыг хөгжүүлэх талаар хэлэлцэн зөвлөмж гаргасан бол 2022 оны зургаадугаар сард Хөвсгөл нуурыг ЮНЕСКО-гийн Дэлхийн шим мандлын сүлжээнд бүртгэсэн нь Хөвсгөлчүүд төдийгүй Монголчууд бидний нэгэн том бахархал болсон билээ.

Сэтгүүлч

Сэтгүүлч Ц.Соёлмаа soyolmaa@vip76.mn