2022.08.03
Ойрын 3 жилийн хугацаанд өр зээлтэй холбоотой дефолт зарлах нөхцөл байдал үүсээгүй
Монгол Улсын Засгийн газрын ээлжит хуралдаан өнөөдөр боллоо. Хуралдаанааар хэд хэдэн асуудал хэлэлцэж, ажлын хэсэг байгуулах үүргийг Ерөнхий сайд өгөв.
Тодруулбал, боловсролын салбар дахь авлига, шан харамж, бэлэг авах зэрэг авлигын шинж чанартай асуудлаар Засгийн газрын иргэд олон нийттэй харилцах 1111 төвд тусгай шугам гаргаж хүлээн авч байна. Энэ дагуу ажлын хэсэг байгуулах үүргийг Ерөнхий сайд өглөө. Энэ хүрээнд Боловсрол шинжлэх ухааны яам, Тагнуулын ерөнхий газар, Авлигалтай тэмцэх газар, Цагдаагийн ерөнхий газар, Нийслэлийн холбогдох албан тушаалтнуудаас бүрдсэн ажлын хэсэг боловсролын салбарт буй авлигалтай холбоотой асуудал дээр ажиллах юм.
Монгол улсын стратегийн бүтээн байгуулалтын ажлыг санаатай зогсоосон, улсад онц их хэмжээний хохирол учруулсан, алдагдсан боломжийн өртөг үүсгэсэн хүмүүсийг шалгаж, учирсан хохирлыг нэхэмжлэх ажлын хэсэг байгууллаа. Энэ ажлын хэсгийг ХЗДХ-ийн сайд Х.Нямбаатар ахална.
Мөн Монгол улсад үүссэн өр, бондуудын зарцуулалтыг бүхэлд нь шалгах ажлын хэсэг байгуулж, даргаар Сангийн сайд Б.Жавхлан ажиллахаар боллоо. Энэ талаар Сангийн сайд Б.Жавхлан дараах мэдээллийг өгсөн юм.
Ойрын 3 жилийн хугацаанд өр зээлтэй холбоотой дефолт зарлах нөхцөл байдал үүсээгүй. 2012 оноос өнөөдрийг хүртэл Засгийн газраас нийт 7 бонд гаргасан.
- 2012 оны 12-дугаар сард "Чингис" бонд 1.5 тэрбум доллар,
- 2015 оны 6-дугаар сард “Димсам” бонд
- 2016 оны 4-дүгээр сард "Мазаалай" бонд
- 2012-2016 онд нийтдээ 2.2 тэрбум төгрөгийн 3 бонд гарсан.
Үүнээс хойш 2016-2021 оны хооронд
- 2017 онд "Хуралдай" бонд, "Гэрэгэ" бонд
- 2020 онд "Номад"
- 2021 онд "Сентури" бонд гээд нийт 3 тэрбум долларын бонд гарсан.
Ингэснээр нийт 7 бондны нийт 5.2 тэрбум долларын бонд гарснаас хамгийн анхны буюу Чингис бондоор төсөл, арга хэмжээнүүдийг санхүүжүүлсэн. Мазаалай бондоор төсвийн алдагдлыг нөхөхөд зарцуулсан. 2016-2020 онд гарсан бонд өмнөх бондны өрийг төлөх зээлийн зохицуулалттай гарсан гэж тэрээр онцоллоо. Мөн ажлын хэсгийн шалгах зүйл цомхон. "Чингис" бондоор санхүүжүүлсэн өр төлбөрүүдийг нэг бүрчлэн судалж, хаана яаж, санхүүжилт хийж хэрэглэсэн бэ гэдгийг шалгана. Бид өр тавих хэмжээ гэхээсээ илүү өрийн зарцуулалт дээр анхаарах ёстой" гэлээ.
