МАХН-ын дарга Н.Энхбаярыг цагдан хорих хугацааг сунгасантай холбогдуулан тус намын Ерөнхий нарийн бичгийн дарга Н.Удвал, нарийн бичгийн дарга Л.Цог, Ёс зүйн хорооны дарга Г.Давааням, Төв аймгийн МАХН-ын мянгатын дарга Б.Батсайхан нар өнөөдөр сэтгүүлчдэд мэдээлэл хийлээ.

 

Н.Энхбаярыг үргэлжлүүлэн хорих болсон нь түүнийг УИХ-ын сонгуульд оролцуулахгүй байх улстөрийн захиалга гэж тус намынхан үзэж байгаагаа мэдэгдэв. Тэд МАХН-ын дарга, Монгол Улсын гурав дахь Ерөнхийлөгч Н.Энхбаяр улс төрийн сэдлээр, хууль бусаар баривчлагдан саатуулагдсанаас хойш 14 хоног болж байна. Монголын төрөөс зохион байгуулсан зэрлэг балмад энэхүү баривчилгаа нь НҮБ-ын Хүний эрхийн конвенци, Монгол Улсын Үндсэн хууль, бусад олон хууль тогтоомжуудыг зөрчсөн тухай Монгол Улсын Хүний эрхийн үндэсний хороо дүгнэлтээ гаргачихаад байхад, хууль бус шийдвэрийг хүчингүй болгож МАХН-ын дарга Н.Энхбаярыг суллуулахгүй байна.

 

Хууль бусаар хийсэн баривчилгааг хүчингүй болгох ёстой байтал Сүхбаатар дүүргийн шүүх хуралдаж цагдан хорих хугацааг хоёр сараар сунгасан нь МАХН-ын дарга Н.Энхбаярыг сонгуульд оруулахгүйн тулд эрх баригчдын захиалгаар хийгдэж байгаа хууль бус үйлдэл хэмээн МАХН үзэж байна" гэв.