Чанарын удирдлагын тогтолцоог нэвтрүүлэх ажлын хүрээнд сургалт зохион байгуулав
2022.01.20

Чанарын удирдлагын тогтолцоог нэвтрүүлэх ажлын хүрээнд сургалт зохион байгуулав

Улсын бүртгэлийн байгууллагын гүйцэтгэлийн төлөвлөгөөний хэрэгжилтийг хангах, чанарын удирдлагын тогтолцоог нэвтрүүлэх бэлтгэл ажлын хүрээнд өнөөдөр /2022.01.20/ ээлжит сургалтыг зохион байгууллаа.

Улсын бүртгэлийн ерөнхий газар болон нийслэл, орон нутаг дахь улсын бүртгэлийн газар, хэлтсийн дарга нарыг хамруулан ISO-9001 стандарт, гүйцэтгэлийн үнэлгээний менежмент зэрэг сэдвийн хүрээнд “Solution Management Group”-ын гүйцэтгэх захирал Н.Хулан, Үйл ажиллагаа эрхэлсэн захирал А.Нарантунгалаг нар илтгэн, сонирхолтой жишээн дээр тайлбарлалаа.

Улсын бүртгэлийн ерөнхий газрын дарга Д.Дэлгэрсайхан сургалтыг нээж хэлсэн үгэндээ “Өнөөдрийн сургалт хэд хэдэн онцлогтой болж байна. Нэгдүгээрт, 2022 оны эхний сургалт болж байна. Хоёрдугаарт, бид бүхний хэрэгжүүлж буй цахим хөгжүүлэлт маань өөрөө процесс сайжруулахтай нягт уялдаа холбоотой. Ялангуяа энэхүү чанарын удирдлагын тогтолцоо, ISO-9001 стандартын үйл явцын сайжруулалтын асуудал дээр чухал яригддаг. Төрийн байгууллагуудад үр дүн, ялангуяа бүтээмжтэй ажиллах, нөөцийн шинжилгээ хийх гэх мэт асуудлууд хангалтгүй байдагт бид дотроо бас шүүмжлэлтэй ханддаг юм.

2022 онд бидний хийж хэрэгжүүлэхээр төлөвлөсөн олон чухал ажлуудын нэг нь энэ стандартыг нэвтрүүлэх үйл ажиллагаа юм. Тус үйл ажиллагаа нь зөвхөн одоо хийгдэж байгаа ажил биш бөгөөд бид байнга процессоо сайжруулах, шинэчлэх талаар хэлэлцэж, тодорхой ажлыг хийж хэрэгжүүлсээр ирсэн. Түүнчлэн шинэ гарсан хууль, дүрмийнхээ хэрэгжилтийг хангах тал дээр ч анхаарч ажиллаж байна. Харин эдгээрийг хамгийн өндөр бүтээмжтэй, үр дүнтэй яаж хэрэгжүүлэх, болохгүй байгаа зүйл юу байна гэдгийг тодорхойлж илрүүлэх хэрэгтэй. Бид үйлчилгээний байгууллага учраас иргэд, хуулийн этгээдүүд болон бусад төрийн байгууллагынханд чиглэсэн үйл ажиллагаагаа илүү сайжруулах ёстой. Бидний хийж хэрэгжүүлж байгаа бүхэн чанартай байснаар найдвартай ажиллагааг бий болгох юм. 2022 онд бидэнд цахимжилтын олон чухал ажлууд бий. Үүнийхээ хажуугаар чанараа дээшлүүлэх, чанарын удирдлагын тогтолцоог Улсын бүртгэлийн байгууллагад нэвтрүүлэх жил болгохыг мөн уриалж байна”... хэмээн онцлов.

Сургалтын төгсгөлд Олон улс судлалын дээд сургуулийн багш, доктор А.Батсайхан Төрийн ёслолын тухай тодруулбал Төрийн ёслолын үүсэл хөгжлийн тухай, төрийн ёслолыг хэрхэн хийх, ямар дэг журамтай байдаг, юунд анхаарах зэрэг асуудлаар илтгэж, сургалт өндөрлөлөө. Сургалтыг танхим болон цахим хэлбэрээр зохион байгуулсан бөгөөд нийслэл, орон нутаг дахь газар хэлтсийн дарга нар, холбогдох ахлах мэргэжилтнүүд цахимаар холбогдов.