Онцгой байдлын алба хаагчдын нийгмийн баталгаа хангагдана
2021.10.17

Онцгой байдлын алба хаагчдын нийгмийн баталгаа хангагдана

УИХ-ын гишүүн Н.Наранбаатар нарын санаачлан өргөн барьсан Гамшгаас хамгаалах тухай хуульд нэмэлт, өөрчлөлт оруулах тухай хуулийн төслийн анхны хэлэлцүүлгийг УИХ-ын Намрын чуулганы нэгдсэн хуралдаанаар хийж дэмжигдлээ.

Аймгийн төвөөс алслагдсан нутаг дэвсгэрт байрлах Онцгой байдлын газар, хэлтэс, салбар нэгжийн алба хаагчдад тасралтгүй ажилласан жилийн урамшуулал олгох хууль, эрх зүйн орчин бүрдээгүйгээс орон нутагт ажиллаж буй онцгой байдлын байгууллагын алба хаагчийн эрх зүйн байдал орхигдож, нийгмийн баталгаа дордох нөхцөл байдал үүсээд байгаад анхаарал хандуулахыг орон нутагт үүрэг гүйцэтгэж буй алба хаагчдаас олонтаа тавьж ирсэн.

Тиймээс нөхцөл байдлыг харгалзан Н.Наранбаатар тэргүүтэй гишүүдийн зүгээс уг хуулийн төслийг санаачлан боловсруулсан бөгөөд төсөлд аймгийн төвөөс бусад суманд тасралтгүй ажиллаж байгаа онцгой байдлын байгууллагын алба хаагчид 30 сарын үндсэн цалинтай тэнцэх хэмжээний мөнгөн урамшууллыг 5 жил тутам олгохоор тусгажээ.