2021.01.13

С.Чинзориг: Музейн хадгалалт, хамгаалалтыг тодруулна уу?

Боловсрол, соёл, шинжлэх ухааны байнгын хорооны өнөөдрийн /2020.01.13/ хуралдаанаар Музейн тухай хуулийн төсөл болон хамт өргөн мэдүүлсэн бусад хуулийн төслүүд /Засгийн газар 2020.05.01-ний өдөр өргөн мэдүүлсэн, анхны хэлэлцүүлэг/-ийг хэлэлцлээ.

Хэлэлцэж байгаа асуудалтай холбогдуулан гишүүд асуулт асууж, хариулт авлаа.

УИХ-ын гишүүн С.Чинзориг асуулт асуулаа: 

Музейн үзмэрийг хадгалах, хамгаалах чиглэлээр төсөв хөрөнгийн боломж хэр байдаг вэ? Одоо байгаа музейнүүдийн хадгалалт, хамгаалалт нь хэр оновчтой болсон гэж үздэг вэ?

Музейд Засгийн газар зэрэглэл тогтоох юм байна. Тодорхой хэмжээгээр  орон нутгийн саналыг үзэж тогтоох хэрэгтэй. Зэрэглэл гэдгээ та бүхэн юу гэж ойлгож байна вэ? Эрдэнэ зуу музей орон нутгийн өмчит байдаг. Өмчийнх нь хувьд яриад байна уу эсвэл үйлчилгээ үзүүлэх хүртээмжийнх нь хувьд зэрэглэл гэж яриад байна уу? Улсын хэмжээнд үйл ажиллагаа явуулдгаас хамаараад зэрэглэх гээд байна уу? Зэрэглэл тогтооно гэчихээд дараа нь өмчтэйгөө хольж хутгаад энэ төрийн өмчийн мэдэлд байна, тэр нь орон нутгийн өмчийн мэдэлд байна гээд байх вий гэдгээс би болгоомжилж байна.

Түүний асуултанд Соёлын дэд сайд М.Батбаяр хариуллаа.