2020.10.23

Б.Бат-Эрдэнэ: Уул уурхайн олборлолтоос болоод соёлын үнэт өвийг устаж алдагдуулахгүй байх заалт байна уу?

УИХ-ын нэгдсэн чуулганаар Засгийн газар 2019.08.16-ны өдөр өргөн мэдүүлсэн, Соёлын тухай хуулийн шинэчилсэн найруулгын төсөл болон хамт өргөн мэдүүлсэн төслүүдийг  хэлэлцэх эсэхийг хэлэлцэж байна.

Хуулийн төсөлтэй холбогдуулан УИХ-ын гишүүд асуулт асууж, санал хэллээ. 

УИХ-ын гишүүн Б.Бат-Эрдэнэ асуулт асуулаа:

Их хурал дээр байдаг буруу жишиг бол хууль оруулж ирэхдээ салбарын ажиллагсдын нийгмийн баталгаатай зүйлийг оруулаад ирдэг. Хуульд ийм зүйл байна уу? 

Дагалдан гаргах хуулиудад өөрчлөлт гаргаж байна. Ашигт малтмалын тухай хуулийн тодорхой зүйл заалтад ямар өөрчлөлт оруулах вэ? Уул уурхайн олборлолт үйл ажиллагаанаас болоод соёлын үнэт өв устах, үгүй болох асуудлууд гарч ирж байсан. Үүн дээр тодорхой хуулийн заалт орж ирж байна уу? 

Дэлхийд бодлого тодорхойлж байсан цаад талын үндсийн үндэс нь хүний сэтгэл оюунтай барилдуулж өгсөн байдаг. 24 жилийн дараа соёлын яам байгуулаад, үйл ажиллагааг нь нэг чигтэй болгож ажиллах гэж байгаа бол үндэсний өв соёл уламжлалын талаар, хүний сэтгэлтэй нь гүн гүнзгий барилдуулж өгсөн өв уламжлалаа сэргээх тал дээр ямар ажил хийх вэ? Зөвхөн арилжаа, мөнгө, ашиг олох тал руу явбал энэ бодлого буруудна. 

Түүний асуултад Соёлын сайд С.Чулуун хариуллаа.