МОНГОЛ УЛСЫН ИХ ХУРЛЫН ГИШҮҮН

Шадар сайд болон УИХ-ын гишүүд Төв аймагт ажиллалаа
2022.12.27
Орон нутгийн хөгжил

Шадар сайд болон УИХ-ын гишүүд Төв аймагт ажиллалаа

Улсын Онцгой комиссын дарга, Монгол Улсын Шадар сайд С.Амарсайхан, УИХ-ын гишүүн Ж.Батжаргал, Ц.Туваан, Н.Энхболд болон бусад холбогдох албаныхан өвөлжилт хүндэрч буй аймаг, сумуудад ажиллалаа.

Тус ажлын хүрээнд Төв аймгийн Эрдэнэ сумд ажиллаж, тус сумын 1 дүгээр багийн малчин өрх н.Даваасүрэнгийн аж байдалтай танилцсан юм.

Гэргий С.Даваагийн хэлж буйгаар өнгөрсөн 30 жилд байгаагүй цастай жил болж буйг дурдлаа. Тэднийх хүн хүч багатай учраас ихэнх бог малаа айлын малтай нийлүүлж өвөлжүүлж, цөөн тооны богоо өөрөө маллаж байгаа гэнэ. Хэдийгээр цөөхөн малтай  хэдий ч цас ихтэй, бэлчээрлэх боломжгүйгээс малаа тэжээж байгаа бөгөөд өнгөрсөн намар 200 боодол өвс базаасан ч хэдийн дууссан. Иймд сумаас өвс тэжээл авч байгаа ч зам даваа хаагдсанаас сүүлийн хэд хоног сум руугаа явж чадахгүй байгаа тухайгаа учирлаж байлаа.

Сум, орон нутгийн удирдлагууд болон Улсын оцгой комиссын зүгээс тус айлд хүнс, эрүүл мэндийн тусламжийн багцыг энэ үеэр хүргүүллээ. Эрдэнэ сумын хувьд нийт нутаг цасан бүрхүүлтэй, 1, 4, 5 дугаар багуудын нутаг дэвсгэрт малын бэлчээр муу, гуу жалгандаа 40-80 см , бусад газартаа 20-30 см цасан бүрхүүл тогтож, мал бэлчээрлэхэд хүндрэл үүсээд байгаа юм.

Малчид байгалийн хадлан 8256.5 тн өвс, ногоон тэжээл 1326 тн, үйлдвэрийн тэжээл 205 тн, гар тэжээл 1250 тн бэлтгэсэн. Сумын аюулгүйн нөөцөд өвс 70 тн, ногоон тэжээл 30 тн, үйлдвэрийн тэжээл 52,5 тн бэлтгэсэн байна. Аюулгүйн нөөцөд бэлтгэсэн өвс тэжээлээс малчидад 1000 боодол өвс, 30 тн хивэг тэжээл, 500 боодол ногоон тэжээлийг хямдралтай үнээр олгожээ.

ШИНЭ МЭДЭЭ