Цахим үндэстэн болох зорилтын хүрээнд төрийн үйлчилгээг иргэдэд ойртуулж, шуурхай, чирэгдэлгүй хүргэх зорилго бүхий “ХурДан” цэгүүдийг Төрийн цахим үйлчилгээний зохицуулалтын газраас байгуулж байгаа билээ.

Сонгинохайрхан дүүргийн хэмжээнд хоёр дахь цэгийг 9-р хорооны нутаг дэвсгэр Баянхошууны тойрогт байрлах “Номин” агуулах худалдааны төвд нээлээ.

Сонгинохайрхан дүүргийн анхны “ХурДан” цэгийг дөрөвдүгээр сарын 27-ны өдөр Олон улсын худалдаа, логистикийн төв буюу 22-ын товчооны авто худалдааны цогцолборт байгуулсан. Өнгөрсөн хугацаанд тус цэгээр үйлчлүүлэгчдийн тоо өдрөөс өдөрт нэмэгдэж байна. Баянхошууны тойрогт хоёр дахь цэгийг ийнхүү нээснээр Баянхошуу, Зүүн салаа, Баруун салаа, Ханын материал, Хилчин хотхон орчмын оршин суугчид хотын төв зорих шаардлагагүй болж, төвлөрөл, түгжрэлийн эсрэг бодит шийдэл болж чадлаа.

УИХ-ын Инновац, цахим бодлогын байнгын хороо манлайлж Цахим хөгжлийг дэмжих хуулиудыг УИХ-аар батлуулсан. Тус хуулиудын нэг болох Нийтийн мэдээллийн ил тод байдлын тухай хуульд Мэдээлэл солилцооны үндсэн систем “ХУР”, танилт нэвтрэлтийн “ДАН” системийг хуульчилсны үндсэн дээр төрийн цахим үйлчилгээний “ХурДан” цэгүүдийг байгуулж байгаа юм.

“ХурДан” цэгийг нийслэл, орон нутаг, хилийн чанадад нийт 504 байршилд нээх ажил эрчимтэй явагдаж байгаа бөгөөд цаашид Сонгинохайрхан дүүрэгт үе шаттайгаар нэмж байгуулна. “ХурДан” лого бүхий үйлчилгээний цэгээс иргэд өнөөдрийн байдлаар 94 төрлийн лавлагаа, тодорхойлолтоос гадна гадаад пасспорт, иргэний үнэмлэх, жолооны үнэмлэх захиалах, солих, нөхөн олгох, тээврийн хэрэгслийн төлбөр, татвар гэх мэт төрийн 39 байгууллагын 440 гаруй үйлчилгээг авах боломжтой.