Нийслэлийн ИТХ-ын төлөөлөгч, дүүргийн Засаг дарга Х.Болормаа цэцэрлэгийн цахим бүртгэл, хамрагдалтай холбоотой асуудлаар шуурхай хурал хийлээ.

Хуралд 1-20 дугаар хорооны Засаг дарга, төрийн өмчийн цэцэрлэгийн эрхлэгч нар оролцов. Нийслэлийн хэмжээнд цэцэрлэгийн элсэлт, бүртгэлийг энэ сарын 10-ны өдрөөс "E-Mongolia" цахим системээр зохион байгуулж эхэлсэн. Сүхбаатар дүүргийн хэмжээнд 2-5 насны 12409 хүүхэд бий. Эдгээр хүүхдүүдийг төрийн өмчийн 35, төрийн бус өмчийн 29 цэцэрлэгт бүрэн хамруулахаар ажиллаж байна.

Хурлын үеэр дүүргийн Засаг дарга Х.Болормаа “Сүхбаатар дүүргийн хэмжээнд бүртгэлтэй байгаа 2-5 насны бүх хүүхдийг цэцэрлэгт хамруулахаар холбогдох хэлтэс, нэгжүүд ажиллаж, шаардлагатай хөрөнгө оруулалт, тохижилт, тоног төхөөрөмж, эд материалын бүх дэмжлэгийг шийдвэрлэсэн. Нийтдээ 300 гаруй сая төгрөгийн санхүүжилтийг дүүргийн Засаг дарга, Засаг даргын Тамгын газрын холбогдох зардлаас гаргасан байна.

БШУ-ны сайдын 2022 оны 07 дугаар сарын 27-ны өдрийн А/267 тоот тушаалын дагуу нэмэлтээр 5 хороонд цэцэрлэгийн салбар бүлэг ажиллуулах аж ахуй нэгж байгууллагуудтай хамтран түрээсийн гэрээ байгуулахаар бэлтгэлийг хангаж байна. Дүүргийн 19 дүгээр хороонд байрлах 280 хүүхдийн ортой 283-р цэцэрлэгт шинээр 24 цагийн үйл ажиллагаатай 2 бүлэг нээж, хүүхдүүдээ авахад бэлэн болоод байна” гэдгийг тодотголоо.

Дүүргийн хэмжээнд нэмэлтээр салбар бүлэг нээж ажиллуулах байршлууд нь 1 дүгээр хороо “Номт сансар” цэцэрлэгийн байр, 8 дугаар хороо АШУҮИС-ийн эзэмшил бүхий оюутны байр, 9 дүгээр хороо “Хүрд” ХХК-ийн эзэмшил сувиллын зориулалттай байр, 11 дүгээр хороо, “Эвт чулуу” ХХК-ийн эзэмшлийн 534-р байрны 1 давхар, 13 дугаар хороо “Хүрд” ХХК-ийн нийтийн байрны зориулалттай 1 давхрын тоосгон барилга зэрэг юм.

Өнөөдрийн байдлаар дүүргийн хэмжээнд 6000 гаруй хүүхэд "E-Mongolia" цахим системээр харьяа хорооныхоо цэцэрлэгт бүртгэгджээ.

Хурлын төгсгөлд Засаг дарга хороодын Засаг дарга, цэцэрлэгийн эрхлэгч нарт дүүргийн хэмжээнд 2022 оны 08 дугаар сарын 24-ний дотор цэцэрлэгийн цахим бүртгэлийг хийж, хамрагдалтыг 100 хувьд хүргэх, хүүхдийн эрүүл аюулгүй орчинд сурч, хөгжих бүхий бэлтгэлийг хангаж, цэвэрлэгээ, үйлчилгээ, тохижилт, өвөлжилтийн бэлтгэлийг сайтар ханган ус, дулааны засвар үйлчилгээг хугацаанд нь дуусгахыг тус тус үүрэг болголоо.