“Хамтдаа оролцоё-Хамтдаа хөгжье” хүүхдийн цахим чуулга, уулзалт боллоо
2021.05.06

“Хамтдаа оролцоё-Хамтдаа хөгжье” хүүхдийн цахим чуулга, уулзалт боллоо

Хүүхдийн язгуур эрх ашгийг хамгаалах, хүүхдийн хөгжил оролцоог бодитойгоор дэмжих, хүүхдэд тулгамдаж буй асуудлыг сонсох, тодорхой түвшинд шийдвэрлэх зорилготой “ХАМТДАА ОРОЛЦОЁ-ХАМТДАА ХӨГЖЬЕ” цахим чуулга уулзалт боллоо.

Тус уулзалтад дүүргийн төрийн болон хувийн хэвшлийн Ерөнхий боловсролын сургууль, Албан бус насан туршийн боловсролын төв, Тусгай сургууль, Скаутын холбооны сурагчид болон Асрамж халамжийн төвд асруулж буй хүүхдүүд, Хөгжлийн бэрхшээлтэй хүүхдүүдийн төлөөлөл болох 400 гаруй сурагч оролцлоо.\

Цахим чуулга, уулзалтын үеэр Сонгинохайрхан дүүргээс баримталж буй хүүхдэд чиглэсэн бодлого, үйл ажиллагаа, бүтээн байгуулалтын талаарх мэдээллийг сурагчдад танилцууллаа.

“Covid-19” халдварын тархалтаас шалтгаалан цахим хэлбэрээр зохион байгуулагдаж буй уулзалтад сурагчид өөрсдөдөө тулгарч буй нийтлэг асуудал, сурч боловсрох, амьдрах орчныг сайжруулах талаар үзэл бодлоо чөлөөтэй илэрхийлэн, санал бодлоо хуваалцаж байгаад баяртай байна.

Уулзалтын үеэр хүүхдүүдийн сонирхсон асуултад хариулт өгч, санал санаачлагыг нэгтгэн шийдвэрлэх үйл ажиллагааны төлөвлөгөөнд тусгахаар боллоо. Мөн дүүргийн удирдлагуудад хүүхдүүд санал хүсэлтээ чөлөөтэй илэрхийлэх фэйсбүүк группийг нээх ажлыг зохион байгуулахыг холбогдох албаны хүмүүст үүрэг болголоо.

Ингэснээр хүүхдүүд өөрт хэрэгтэй төрийн үйлчилгээг шууд авах боломжтой болох юм.

Өнөөдрийн цахим уулзалтыг дүүргийн ЗДТГ, Гэр бүл, Хүүхэд, залуучуудын хөгжлийн хэлтэстэй хамтран Боловсролын хэлтэс, ГБХЗХХ-ийн дэргэдэх Залуучуудын хөгжлийн төв, “Хүүхдийн холбоо”, Ерөнхий боловсролын сургуулиуд зохион байгууллаа.

Сэтгүүлч

Редактор Ц.Соёлмаа soko@vip76.mn