УИХ-ын гишүүн Н.Алтанхуяг, Кёкшүзан Д.Батбаяр нар өчигдөр Төрийн ордноо СХД-ын 27-н ахмадын хорооны дарга нараа хүлээн авч уулзлаа. Ахмадуудын төлөө төрийн зүгээс ямар бодлого шийдвэр гаргавал амьдралд тус болох талаар санал, бодлыг нь хуваалцжээ.


Ахмадуудын хувьд үе үеийн парламентад сонгогдсон гишүүдээс өмнө нь ахмадын хорооны дарга нарыг цуглуулан санаа бодлыг нь сонсож, ахмадуудын төлөө, дүүрэг хороон дээр хийгдэх ажлын талаар санал хүсэлтийг нь сонсож байгаагүйг онцлов. Тухайлбал, СХД-ийн ахмадын хорооны дарга н.Сандуйжав "Би 42 жил би МАХН-ын гишүүн байж албан тушаал хашиж явсан.

Гэхдээ өнөөдөр бид хийж бүтээж байгаа зүйлийнхээ төлөө улстөржмөөргүй байна. Хийсэн нэгнээ дэмжиж урам өгч байх ёстой гэж би боддог. Тэр утгаараа СХД-ээс УИХ-д сонгогдсон АН-ын хоёр гишүүнийхээ хийсэн ажилд сэтгэл хангалуун байдаг. СХД-т ахмадын сувилал байгуулагдана хэмээн 500 сая төгрөг хуваарилагдсан ч одоо хэр нь таг чиг" байгаа талаар ярьсан юм. Мөн ахмадуудын тэтгэврийн  зөрүү арилсан гэж байгаа боловч огт арилаагүй байгааг ч хөндөв. Түүнчлэн 70-аас дээш настай хөгшдийн 1.5 сая төгрөгийг бэлнээр өгч болохгүй юу гэх саналыг ч гаргав. Н.Алтанхуяг дарга ахмадуудад хандан ирэх жил дүүрэгтээ томоохон спорт цогцолбор болон 7-8 сая долларын өртөг бүхий нэгдсэн эмнэлгийг барьж эхлүүлэхээр болсноо  дуулгав. Эрхэм гишүүд энэ мэт ажлынхаа хажуугаар дүүргийнхээ иргэдэд нүүрсийг хямд өртөгөөр хүргэх зорилгоор 50 кг-ийн шуудайтай Багануурын нүүрсийг холбогдох хүмүүстэй ярьж гэрээ хийсний үндсэн дээр нэг бүрийг нь 2500 төгрөгөөр хүргэж байгааг нь зарим ахмадууд дэмжиж байгаа ч зарим нэгнийх нь хувьд энэ мэт жижиг  асуудал руу орж доошоо орох хэрэггүй. Харин цахилгаанаар халдаг халаагуур авч өгөөд цахилгааны үнийн хөнгөлөлтөн дээр анхаарах  хэрэгтэйг  ч  сануулж  байлаа.