Монгол Улсын Их Хурлын даргын ивээл доор зохион байгуулагдаж буй “Эмэгтэй бизнес эрхлэгчдийн санхүүгийн код” хөтөлбөрийн нээлт өнөөдөр /2025.04.16/ Төрийн ордны “Их Монгол” танхимд боллоо.

Монгол Улсад “Эмэгтэй бизнес эрхлэгчдийн санхүүгийн код” санаачилгыг Үндэсний хэмжээнд хэрэгжүүлж эхэлсэн. Бизнес эрхлэгч эмэгтэйчүүдийг дэмжиж, эдийн засгийн хувьд чадавхжуулах нь гэр бүлийн орлого, амьдралын чанар, хүүхдийн боловсрол зэрэгт эерэг нөлөөтэйгөөс гадна бизнесийн орчныг бүхэлд нь эрчимжүүлж, нийгмийн олон асуудлыг шийдвэрлэхэд чухал хөшүүрэг болдгоороо онцлог юм.

Эмэгтэйчүүдийн зээлийн дундаж хэмжээ 66.4 сая төгрөг байгаа нь эрэгтэйчүүдээс 45 орчим хувиар бага, зээлийн дундаж хүү нь 0.8 пункт бага байгаа нь зээл авах нөхцөл харьцангуй үнэтэй, илүү дарамттай байгааг илтгэж байна. Бизнес эрхлэгч эмэгтэйчүүдэд барьцаа хөрөнгийн дутагдал, санхүүгийн боловсрол, бизнесийн сүлжээ, зах зээлийн хязгаарлагдмал байдал, жендэрийн хэвшмэл ойлголтууд зэрэг нь тулгамдаж байна.

Тиймээс “Эмэгтэй бизнес эрхлэгчдийн санхүүгийн код” хөтөлбөрийг хэрэгжүүлж эхэлснээр эмэгтэйчүүдэд ззэлийн тэгш боломж бий болж, жендэрт суурилсан санхүүгийн бүтээгдэхүүнүүд гарах юм.

Мөн Монгол Улс Төв Азийн бүс нутагт “Эмэгтэй бизнес эрхлэгчдийн санхүүгийн код”-д нэгдсэн анхны орнуудын нэг болж, бүс нутагтаа туршлагаа түгээх, хамтын ажиллагааг манлайлах боломжтой болж байна. Монгол Улсын Их Хурлын зүгээс бизнес эрхлэгч эмэгтэйчүүдийг бодлогоор дэмжих, холбогдох хууль эрх зүйн орчныг боловсронгуй болгоход анхаарч, та бүхний санал санаачилгыг бүхий л талаар дэмжин ажиллах болно.